NAGA CITY- Preparado na an Triangulo Elementary School para sa pagbubukas kan klase sa aldaw nin Lunes, Hulyo 29, 2024.
Sa entrevista kan Bombo Radyo Naga ki Yves Joseph Antonio, Teacher sa Triangulo Elementary School, sinaysay kaini na prepado na an mga gagamiton na classroom kan mga kaakian nin huli ta nasa marhay na kondisyon na an mga ini makalihis an pigsagibong Brigada Eskwela.
Katakod kaini, nagpakol man sa nasa labi 320 an saindang mga enrollees alagad, aakuon pa an mala-late na mag-enroll sa aldaw nin Lunes.
Sigun ki Antonio, sa enot na aldaw kan klase sa Hulyo 29, liwat kaining pinagirumduman an mga magurang na kung pwede, ihatod-sundo an saindang mga kaakian, pirmeng ipasiguro an payong, pack lunch orog na ta nakakaeksperyensiya an bilog na nasyon nin pag-uuran sa mga nakalihis na aldaw.
Apwera digde, pigsierto man kan paratukdo na secure an saindang mga estudyante nin huli ta igwa man mabantay na mga kapulisan sa saindang area na preparadong magtaong asistensiya sa mga mangangaipuhan.
Mientrastanto, hagad man ni Antonio na masimbagan an problema sa suplay nin tubig nin huli igwa soboot na mga oras na mayong tubig sa mga faucet na dakulang concern para sa gabos.
Sa ngunyan, kamawotan na sana kaini na magin matrayumpo an pagbwelta kan klase sa aldaw nin Lunes asin mayong mairehistrong mga untowards incident.
