Nagbabala si US President Donald Trump na susunugin ng Estados Unidos ang mga planta ng kuryente ng Iran kung hindi bubuksan ng Tehran ang Strait of Hormuz sa loob ng 48 oras, kasunod ng pagpapalitan ng missile strikes sa pagitan ng Iran at Israel na nagdulot ng pinsala at pagkakasugat sa mga sibilyan.
Sumiklab ang tensyon sa Gitnang Silangan sa ika-apat na linggo ng digmaan matapos tamaan ng Iranian missiles ang dalawang lungsod sa timog Israel — Dimona at Arad — malapit sa pangunahing nuclear research center ng bansa. Naiulat ang pagkawasak ng ilang gusali at pagkakasugat ng dose-dosenang tao.
Ayon kay Israel Prime Minister Benjamin Netanyahu, mas pinapadala ang mga emergency crews sa mga apektadong lugar. Ito rin ang kauna-unahang pagkakataon na nakalusot ang mga missile ng Iran sa mahigpit na air defense ng Israel sa paligid ng nuclear site.
Nagbabala naman si Trump, na nahaharap sa presyur sa loob ng bansa dahil sa tumataas na presyo ng langis, na kung hindi bubuksan ang makasaysayang ruta sa langis, sisimulan ng U.S. ang sunud-sunod na pag-atake sa mga planta ng kuryente ng Iran, simula sa pinakamalaki.
Samantala, iniretaliyo rin ng Iran ang strike sa kanilang nuclear facility sa Natanz at naglunsad ng missile attack sa Diego Garcia, isang base militar ng U.K. at U.S. sa Indian Ocean, na nagpatunay sa abot ng kanilang missile program. Ayon sa mga eksperto, maaaring ginamit ng Tehran ang kanilang space program bilang improvised missile launch.
Patuloy na nararamdaman ang epekto ng digmaan sa buong rehiyon. Tumaas ang presyo ng langis at enerhiya, habang libu-libong sibilyan ang lumikas sa Lebanon at iba pang bahagi ng Gitnang Silangan. Iniulat ng gobyerno ng Lebanon na mahigit isang milyong katao ang nawalan ng tirahan at higit 1,000 ang nasawi sa mga Israeli strikes sa Hezbollah.
Ang tensyon sa Strait of Hormuz ay nagdudulot ng pandaigdigang pangamba sa seguridad ng langis, na nag-udyok sa mga bansa tulad ng U.A.E., U.K., Germany, France, at Japan na ipahayag ang kahandaan nilang makiisa sa seguridad ng shipping.
