Kinumpirmar ni US special envoy Steve Witkoff na papangenutan ni US President Donald Trump an Gaza meeting sa White House, aldaw nin Miyerkules, oras sa Amerika.
Sinaysay man ni Witkoff na nilalaomang mawakas an giyera sa pag-ultanan kan Israel asin man Hamas sa Gaza sa pagtatapos kan taon.
Magkasuhay man na pigkumpimar kan US State Department na makikipaghilingan si US Secretary of State Marco Rubio ki Israeli Foreign Minister Gideon Saar sa Washington sa parehong aldaw bandang alas-3:15 nin pagkahapon eastern time.
Naenot man na nagpromisa si Trump para sa tulos na pagwawakas kan giyera sa pag-ultanan kan magkalabang panig kan nakalihis na 2024 US presidential campaign asin makalihis na magtukaw sa pwesto kan nakalihis na Enero alagad haros pitong bulan na sa saiyang ikaduwang termino, nagtitinir pa man na mailap pa man giraray an nasambitan ng obheto.
Sa presenteng datos kan Gaza health authorities, magpuon an pag-atake kan Hamas sa southern Israel kan nakalihis na Oktubre 7, 2023, nakagadan an giyera nin labi sa 62,000 Palestino, nag-displace man an bilog na populasyon sa Gaza asin nagsapo an mga residentes nin krisis nin kagutuman na nagresulta kan akusasyon sa Israel kan genocide asin war crimes sa teritoryo, bagay na pinahimutikan man kan lado kan Israel.
