Pighali na ni US President Donald Trump an video na saiyang pigbugtak sa social media account kaini na sarong klase kan pangraraot ki dating president Barack Obama asin agom kaini na si Michelle.
Pigkokonsederar kaya kan kadaklan na sarong klase nin pagigin racist an ginibo kan US President huli ta pigkonsederar ni Trump an mag-agom komo mga unggoy.
An 62-segundo na video an igwang laog dapit sa dayaan soboot sa eleksyon kan 2020 presidential election.
Sa nasambitan ng video, mahihiling an nagkapirang mga bistadong Democrats na nag-anyong hayop siring ninda New York Representative Alexandria Ocasio-Cortez, New York Mayor Zohran Mamdani asin dating Secretary of State Hillary Clinton magin si dating President Joe Biden an nag-anyong unggoy na nagkakakan nin batag.
Nagdepensar man an White House sa nasambitan ng post asin sinabi na sarong klase kan meme video kun saen pinayuhan an mga kritiko na untukan na maangot. Saro si Republican Senator Tim Scott na black American an nangapudan ki Trump na halion an video kun saen ini an pinaka-racist na saiyang nahiling na ginibo kan White House.
Makalihis na makareseber nin batikos gikan sa nagkapirang Republican senators na kaalyado ni Trump, pighali na an nasambitan ng post sa Truth Social account ni Trump.
Pigsaysay kan opisyal kan White House na nasala sana an saro nindang staff kaya naipost ini.
