Pigreport kan state weather bureau na nasa luwas na kan Philippine Area of Responsibility (PAR) an Typhoon Uwan (International name: Fung-wong) ngunyan na Martes, Nobyembre 11, alagad nakabandera pa man giraray sa nasa 32 na lugar sa Luzon an tropical cyclone wind signals.
Nagtitinir sa Signal No. 2 an Batanes, Cagayan (kaibahan an Babuyan Islands), Apayao, Abra, Kalinga, parte kan Mountain Province asin Benguet, Ilocos Norte, Ilocos Sur, asin norte kan La Union.
Signal No. 1 man an iba pang lugar sa Luzon, kabali na an Metro Manila, Rizal, Laguna, asin Batangas.
Basado sa weather bulletin kan weather bureau, huring nahiling an bagyo sa rayong 365 kilometro sulnupan kan Calayan, Cagayan, na pasakat an hiro sa rekas na 15 kph, na may duros na nag-aabot man sa 120 kph asin bugso na hasta sa 150 kph.
Sigun pa sa weather bureau, padagos na maikot an bagyo pasiring norte antes na magliko pasiring sa northeast, asin piglalaoman na maluya sa severe tropical storm antes magtama sa western Taiwan.
Dae man pighahali kan state weather bureau an posibilidad na pagbalik kan bagyo sa PAR na piglalaoman sa Miyerkules nin bangi Nobyembre 12, asin maluya pa sa remnant low pag-abot sa kadagatan harani sa Ryukyu Islands sa Biyernes, Nobyembre 14.
