Pigsierto kan United Nations an nakapreparar na pondo para sa mga paraoma asin parasira na maaapektaran sa panlalamasa kan Super Typhoon Pepito.
Kan nakalihis na Biyernes, Nobyembre 16, 2024 pig-activate na kan United Nations – Food and Agriculture Organization (FAO) an Anticipatory Action(AA) mechanism kaini sa Catanduanes asin Northern Samar.
An AA saro sa mga modernong sistema na piggamit kan UN sa pagtugon sa mga kalamidad asin mapakusog an mga residenteng direktang maapektaran kan mga kalamidad.
Sigun sa UN, igwang pondong nakalaan tanganing tabangan an mga parasira asin paraomang maaapektaran sa panlalamasa kan bagyo.
Pigbibilog ini kan 2,813 na paraoma asin parasira gikan sa probinsiya kan Catanduanes (Gigmoto, Pandan, Baras, Bato, San Miguel, San Andres, asin Virac) asin 3,610 na paraoma asin parasira gikan sa Northern Samar.
An kada benipisyaryo piglalaomang makaresibir nin tig-P3,300 cash.An pondo na gikan sa German Federal Foreign Office pig-agi sa FAO Special Fun for Emergency and Rehabilitation Activities (SFERA).
Pira sa mga pigkokonsiderar na salik kun piga-activate an AA kun magpakol sa 89kph an kusog kan bagyo, igwang langkaw na banta kan landslide asin pagbaha, asin nakalangkaw an Red Alert Level sa laog kan 200km diameter gikan sa sentro kan bagyo.
Kaiba man digde an posibilidad na maapektaran an hasta 15% nin kabilogang populasyon.
Sa laog kan sarong semana an duwang beses na pig-activate kan UN an AA, enot kan nakalihis na manlamasa an bagyong Nika kaining nakalihis na Lunes, Nobyembre 11, 2024 sa probinsiya kan Isabela.
Kabilogan na 963 farmers an nakinabang digde.
