Nabawasan an mga Pilipinong mayo nin trabaho sa Pilipinas segun sa datos kan Philippine Statistics Authority (PSA).
Sa intrevista kan Bombo Radyo Naga kay Dr. Emmanuel Onsay, sarong certified public accountant asin ekonomista, dugay na an nabawas sa mga mayo nin trabaho sa Pilipinas asin posibleng madugangan na naman ini huli ta kadakol na naman an mga nagradwar ngunian na taon. Segun pa saiya, dawa na nagluluwas sa survey na kadakol an may trabaho sa nasyon, kadaklan digdi bako man talagang si saindang tinapusan pag-adal.
Huli sa kadakol an naghahanap nin trabaho, saro ini sa mga rason kan tano haloy an paglangkaw kan sahod nin mga obrero asin pagtugot kan mga employer na mag-resign an mga empleyado huli ta kadakol an nangangaipuhan nin trabaho.
Nawawaran nin matitibay na mga empleyado an nagkapirang kumpanya huli ta sinda an nakakapagboot kan sadiri nindang mga panundo orog na pag-abot sa mga pasahod.
Huli digdi, napipiritan an nagkapirang mga Pilipino na hanapon an oportunidad sa ibang nasyon. An milyon-milyon na numero kan unemployed saro pa sa mga rason kun tano ta halangkaw an standards kan mga kumpanya o halangkaw an kalipikasyon pag-abot sa mga aplikante.
Nagiging kampante an mga kumpanya na kun may magbutas man na empleyado, igwang tulos na masangli digdi.
Maging sa mga ahensya kan gobyerno, dipisil man suboot giraray makalaog nin trabaho huli ta mas napapaboran an igwa nin mga backer.
Dugang pa ni Onsay na dakulang tabang an ayuda system sa nasyon orog na sa mga indigent o mga Pilipinong mayo nin trabaho alagad igwa man ining negatibong epekto huli ta an iba sa mga benepisyaryo, nag-aasa na sana sa ayuda asin dai na nagpupursige na makahanap nin trabaho.
