Nagpepreparar na soboot an militar kan Estados Unidos para sa posibilidad kan dagos-dagos asin pirang semanang operasyon kontra sa Iran kun isusugo ni U.S. President Donald Trump na atakihon an nasyon, sigun sa duwang opisyal kan US.
Sigun sa mga opisyal na nagsayumang magsambit nin pangaran huli sa sensitibong isyu, mas mahewas asin mas seryoso an plano kan operasyon kumparar sa mga naenot nang military retaliation kan US.
Napag-araman na nakatalaan na makipag-ulay an representate kan Amerika na sinda Steve Witkoff asin Jared Kushner sa mga representate kan Iran sa Geneva sa Martes, kun saen magseserbeng tagapamagitan an Oman tanganing pag-ulayan an kasunduang pangkatuninongan.
Enot nang sinaysay ni US Secretary of State Marco Rubio na mas mawot ni Trump an sarong kasunduan sa Tehran alagad aminadong masakit ining maabot.
Mientrastanto, pigkumpirmar kan mga opisyal na magpapadara an Pentagon nin dugang na aircraft carrier sa Middle East, kaibahan an ribo-ribong tropa, fighter aircraft, asin guided-missile destroyers.
