Pig-anunsyar kan Estados Unidos na matao ini nin maritime fund para sa mga nasyon sa Indo-Pacific Region kaibahan an Pilipinas.
Ini an tanganing tabangan an mga nasyong maprotehiran an saindang katubigan asin malabanan an illegal maritime activities na nagbabalgar sa international laws.
Obheto man kan bagong US funding na mapakusog pa an maritime law enforcement capacity kan mga nasyon sa rehiyon kaibahan an Vietnam, Indonesia, Malaysia, Pacific Islands, Pilipinas asin iba pang maritome South Asian nations.
Sa saiyang pahayag, binatikos ni Rubio an pagpapalawig asin bakong makatarungang maritime claims kan China sa pinag-iiwalang kadagatan sakop kan West Philippine Sea asin an mapangraot na paagi kaini.
Sa parehong pag-urulay, pig-enkaminar man ni Philippine Foreign Affairs Secretary Theresa Lazaro an mga nasyon na tuyawan an mga nagbabalgar sa international maritime law asin naggigibo nin mga agresibong aksiyon na pigbubugtam asin nakakadanyar sa seguridad kan mga barko asin lunadang panghimpapawid.
