Plano ng administrasyon ni US President Donald Trump na magdagdag ng firing squad, electrocution, at gas asphyxiation bilang alternatibong paraan ng pagbitay sa mga nahatulan ng mabibigat na krimen sa pederal na antas.
Inihayag ito sa ulat ng US Department of Justice, na nagsasabing layunin ng hakbang na matugunan ang kakulangan sa mga gamot na ginagamit sa lethal injection, ang kasalukuyang pangunahing paraan ng execution sa bansa.
Ayon kay Acting Attorney General Todd Blanche, ang pagdaragdag ng mga alternatibong pamamaraan ay magbibigay-daan upang maipatupad ang parusang kamatayan kahit kulang ang suplay ng mga kinakailangang gamot. Kabilang sa mga isinusulong na paraan ang firing squad at electrocution, pati na ang gas asphyxiation na unang ginamit ng estado ng Alabama noong 2024.
Matatandaang muling ibinalik ni Trump ang federal executions sa kanyang unang termino matapos ang halos dalawang dekadang paghinto, kung saan 13 bilanggo ang pinatawan ng kamatayan sa pamamagitan ng lethal injection. Sa kanyang pagbabalik sa puwesto, inalis din niya ang moratorium na ipinatupad ni dating Pangulong Joe Biden.
Sa kasalukuyan, tinatayang higit 40 kaso ang hinihingan ng death penalty ng Justice Department, bagaman wala pang umaabot sa aktwal na execution dahil sa mahabang proseso ng paglilitis at legal na hamon.
Nanatiling kontrobersyal ang parusang kamatayan sa Estados Unidos, kung saan ayon sa mga survey, bumababa ang suporta ng publiko dito. Ilang kritiko, kabilang ang American Civil Liberties Union at ilang mambabatas tulad ni Senador Dick Durbin, ang tumutol sa panukala at tinawag itong malupit at hindi makataong paraan ng pagpaparusa.
Sa kabila nito, iginiit ng administrasyon na kinakailangan ang mga bagong opsyon upang matiyak ang pagpapatupad ng batas laban sa pinakamabibigat na krimen sa bansa.
