Padagos an pag-umento kan utang kan Pilipinas huli ta nagbabago an halaga kan kwarta, purchasing power, inflation asin iba pang mga bagay na nakakaapektar sa padagos na paglangkaw kan utang kan nasyon.
Sa intrevista kan Bombo Radyo Naga ki Dr. Emmanuel Onsay, CPA/Economist, nangyayari man maging sa ibang nasyon an paglangkaw kan saindang mga utang, alagad sa Pilipinas nasobrahan nangg maray an rikas kan paglangkaw kan utang na kun sain nagpakol na sa P19.76 trillion pesos.
Sigon ki Onsay, saro sa mga rason kan pag utang kan Pilipinas an kakulangan sa pondo asin kakulangan sa nakokolektar na tax tanganing mapondohan an gabos na mga serbisyo asin proyekto kan gobyerno. Huli digdi, sa taxes man sana kinukua an ibabayad sa pagkakautang kan nasyon.
Mientrastanto, apwera sa principal amount, binabayadan man kan nasyon an interes kaini asin nakakamundo na mas dakol an kantidad na inuutang kaysa sa ibinabayad kan Pilipinas huli ta nakadepende ini sa kantidad kan piso kontra dolyar.
Dagdag pa ni Onsay na kun magagamit nin tama an pondo kan Pilipinas asin kun mayo nin kurapsyon, posibleng daing gayo magpaparautang an nasyon o makautang man, kadikit sana an kantidad.
