NAGA CITY- Nakaguno nin manlaen laeng mga reaksyon hale sa mga Bicolano an mga pangbabatikos ni VACC Founding Chairman Dante Jimenez ki Vice President Leni Robredo katakod kan ginibo kaining pagpapabot sa United Nations kan mga kontrobersyal na pangyayari sa Pilipinas sa paagi nin video message.
Nagpoon ini makalihis an entrevista kan Bombo Radyo Naga ki Jimenez, kun saen prangkang sinaysay kaini na garu dae na naiintindihan ni Vice President Robredo an papel kaini komo bise presidente asin komo sarong abogado.
Sigon ki Jimenez, posibleng sala an mga suhestyon ni Robredo ki presidente Rodrigo Duterte kun kaya nasasabi kan lado kaini na dae dinadangog kan Duterte Administration an saiyang mga opinyon.
Ipapasakamot naman kan VACC sa House of Representatives an impeachment case laban ki Robredo mantang pinag-aadalan naman ninda an disbarment case na isusunad sa bise presidente enkaso magsayuma ining magpublic apology huli sa pangyayari.
Katakod kaini, disganado man an nagkapirang mga bicolano huli naman ta imbes na ibangon suboot ni Jimenez an saiyang kababayan na naging dalan tanganing maipaluwas an totoong problema sa nasyon, garu nagiging dalan pa suboot ini tanganing mas mabugtak sa alanganon an nasambitang opisyal.
Kun marurumduman, inuran man nin negatibong reaksyon an VACC Chair kan pirang beses kaining batikuson an Bicolanang Senador na si Senador Leila De Lima huli sa kasong kinaimbweltuhan kaini.
