NAGA CITY- Pigsierto ngunian kan kampo ni Vice President Leni Robredo na mayo ining anggot o raot nin boot sa presenteng administrasyon o sa mismong presidente kan nasyon.
Ini katakod kan nagkapirang bagay asin isyu na dae nagkakasundo an Bise Presidente asin si Presidente Rodrigo Duterte.
Sa entrevista kan Bombo Radyo Naga ki Georgina Hernandez, tagapagtaram ni Vice President Robredo, sinaysay kaini na sa ibong kan dae pagkakasundo kan duwang halangkaw na opisyal sa nagkapirang mga isyu, magtitinir man giraray an suporta kan ikaduwang presidente sa mga magagayon na bagay na ipapautob ni Presidente Duterte para sa nasyon.
Alagad mas magigin makusog soboot an boses kan Bise Presidente para kontrahon an mga bagay na aram niyang ikakaraot kan namamanwaan.
Sigon ki Hernandez, kadakol pang plano an Bise Presidente sa mga masunod na aldaw asin dae soboot ulang an pagbutas kaini komo chairperson kan Housing and Urban Development Coordinating Council (HUDCC) para dae kaini magibo an saiyang mga responsibilidad komo ikaduwang presidemte kan nasyon.
