Nagpaluwas nin pahayag an Malacañang bilang simbag sa mga komento ni Bise Presidente Sara Duterte laban ki Presidente Ferdinand Marcos Jr., na inaapod siyang “mayong modo.” Segun sa Palace Press Officer Atty. Claire Castro, dai dapat gamiton an termino sa paglaladawan sa Presidente kundi an mga imbwelto sa kadahasan, pananakot, asin pagpalakop nin salang impormasyon.
Ipinaliwanag ni Castro na mas angay an terminong “shameless” sa mga indibidwal na imbuelto sa garadanan, sa mga soboot nagsugo na gadanon an saindang mga kalaban, asin sa mga nagpapatakot sa kapwa. Dugang pa kaini, kabali man digdi an mga nagpapalakop nin fake news nganing magpahiling na tama asin patriyotiko an saindang sadiri.
Tinatsaran man ni Castro an gawe-gawe kan Bise Presidente, na suboot iba kun dai siya nagbabasa nin sarong inandam na diskurso. Segun saiya, kun mayo nin iskrip si Duterte, nabubuyagyag an saiyang tunay na karakter asin kawaran nin ugali.
An pahayag ni Malacañang bilang simbag sa naenot na pahayag ni Bise Presidente Duterte na mayo siyang intensyon na agawon an pwesto ni Presidente Marcos. Lugod, gusto kaini na magtinir ini sa pwesto tanganing mahiling kan publiko an tunay na karakter kan Presidente.
Katakod kaini, inabisuhan ni Castro an Bise Presidente na pumondo na sa pagsagin-sagin na dae invuelto sa mga isyung may kinaaraman sa destabilisasyon. Sinabi pa kaini na an mismong mga kaalyado ni Duterte soboot an nagtutulod nin mga lakdang na posibleng magcausa nin karibokan laban sa administrasyon.
