Mapakol sa 7 na insidente nin wildfire an nairehistro sa ikaduwang aldaw poon kan ini magputok sa Los Angeles, California USA kansuodma, Enero 8.
Kabali sa mga naikurit na insidente nin wildfire sa LA iyo an Olivas fire, Hurst fire, Woodley fire, Lidia fire, Sunset fire asin an pinakadakula sa mga ini iyo an kasulo sa Palisades asin kasulo sa Eaton, kun saen haros 27,000 ektarya an nasulo.
Mga 137,000 indibidwal an pirit na pig-ebakwar gikan sa 2 lugar na tinupok kan kasulo. An Hurst Fire nagbungkaras sa Sylmar sa norte kan San Fernando mantang an Sunset Fire saro sa pinakabagong nagbungkaras man sa Hollywood Hills harani sa Runyon Canyon.
Huli kaini, nagkapirang harong kan mga celebrity sa Hollywood an naubos man kan wildfire asin napiritan na mag-ebakwar.
Kabali sa mga nasulo iyo an mga harong kan nagkapirang bantog na mga celebrity/personalidad sa Hollywood, an star actress kan Estados Unidos na si Mandy Moore, an harong ni Paris Hilton sa Malibu, an $6.5 milyon na pagsasadiri sa Los Angeles kan aktor/mag-agom kan Estados Unidos na si Leighton Meester asin Adam Brody, an multimilyon na dolyar na mansyon kan Hollywood star na si Anna Faris, siring man an mga pagsadiri kan Pacific Palisades kan mga aktor na si Miles Teller asin Eugene Levy, komedyante na si Billy Crystal asin Oscar winner na si Anthony Hopkins asin iba pang mga Hollywood star.
Ibinareta man na an Duke asin Duchess kan Sussex, si Prinsipe Harry asin Meghan Markle an posible na mapiritan na mag-ebakwar man sa saindang harong sa Montecito, California sa tahaw kan mga pagkawara nin kuryente asin enkaso an kasulo maglakop pa.
Mientrastanto, an mga bombero sa LA nakakaeksperyensya man nin kakulangan nin tubig sa pagpauntok nin mga kasulo sa wildfire, na an nagkapira sa mga alternatibong pinagkukuanan nin tubig iyo an mga swimming pool asin danaw.
Dati nang kinumpirmar kan mga otoridad na 5 katawo an nagadan mantang labi sa 100,000 na mga residente an napiritan na mag-ebakwar hale sa kasulo sa Eaton mantang 37,000 an nag-ebakwar huli sa Palisades inferno.
An kasulo na enot na nagbungkaras sa Palisades kan Martes pigkokonsiderar na pinakapeligruso sa bilog na histroya kan LA.
