Ireretiro na kan Minnesota Timberwolves an No. 21 jersey kan dating NBA star na si Kevin Garnett.
Gigibuhon an retirement honors sa Target Center sa Pebrero 28, 2027, sampulong taon matapos ining magretiro sa liga.
Kun babalikan, ginugol ni Garnett an enot na 12 taon kan saiyang karera sa Wolves asin pinanginotan kaini an koponan sa kainot-enoti kaining playoff appearance kan 1997.
Sa sumunod na walong season, padagos na nakalaog an Wolves sa postseason hasta sa makatungtong sinda sa Western Conference Finals kan 2004.
Alagad na-trade si Garnett sa Boston Celtics, kun sain nakua kaini an saiyang NBA championship kan 2008.
Liwat ining nagbalik sa Minnesota kan 2015, alagad dagusan na nagretiro kan nagsunod na season.
Antes kaini nagdesisyon na an Wolves na iretiro an No. 21 jersey ni Garnett kan 2016, asin poon kaidto dai na tinugutan an ano man na magkawat kan Minnesota na magsulot kan nasabing jersey number.
Mientrastanto dai ini inako ni Garnett huli sa alitan kaini sa dating Timberwolves owner na si Glen Taylor.
Matapos maibenta an Wolves sa mga bagong maysadiri, inaasahan na maatinder na an Minnesota legend sa isasagibong seremonya sa masunod na taon.
