NAGA CITY- Tinawan nin pagbisto sa probinsya nin Catanduanes an bicolanong pigmimirar na last man standing asin sa 44 mga miyembro kan Special Action Force (SAF) na nagadan sa makangirhat na engkwentro sa Mamasapano, Maguindanao, tolong taon na an nakakalihis.
Sa entrevista kan Bombo Radyo Naga ki PS/Supt Felix Servita, Provincial Director kan Catanduanes, sinaysay kaini na pigkondusir sa Catanduanes State University (CSU) pasado alas 8 subagong aga an sarong wreath laying ceremony komo pagrumdom asin pagtatao nin pagbisto sa pagiging herowe ni PC/Insp. Max Jim Tria makalihis na ibuwis an sadiring buhay sa paglapag sa mga teroristang sinda Zulkifli bin Hir alyas Marwan asin Basit Usman.
Nag-atendir man sa nasambitang aktibidad an mga opisyales kan nasambitang probinsya sa pangengenot ni Governor Joseph Cua, Congressman Cesar Sarmiento, Virac Mayor Samuel Laynes, mga PNP personnel asin an ama ni Tria na si Guillermo Tria na nagpaabot nin pasasalamat sa pagrumdom sa saiyang aki.
Alumni kan nasambitang eskwelahan si Max Jim Tria kaya digdi pigkondusir an nasambitang aktibidad.
Mientrastanto, naglalaom an opisyal na dae malilingawan kan mga tao urog na kan mga jovenes an sakripisyong ginibo kan mga SAF troppers.
