NAGA CITY- Gadan an sarong persona mantang irido man an limang iba pa sa banggaan nin duwang bihikulo sa Barangay Batican, Infanta, Quezon.
Binisto an nagadan na si Rodolfo Calubayan, 48-anyos, driver nin tricycle mantang irido man an lima kaining mga pasahero.
Sa entrevista kan Bombo Radyo Naga ki PC/Insp. Mark Amat, Chief of Police (COP) kan Infanta-PNP, sinaysay kaini na mantang binabagtas kan tricycle na nilulunadan kan mga biktima an kalabaan kan tinampo sa nasambitang lugar kan aksidente ining mabangga kan pampasaherong bus na minamaneho man ni Angelito Estrabo, 38-anyos.
Huli sa kusog kan pagkakabangga, nagsapo nin lugad sa manlaen laeng parte kan saiyang lawas an mga biktima na tulos man na pigdalagan sa ospital alagad pigdeklarar na dead on arrival kan mga doktor si Calubayan.
Sa inisyal na imbestigasyon kan Infanta-PNP, nagluluwas na nilikayan suboot ni Estrabo an tinatapos na konstruksyon sa lugar na nagin rason sa pagbangga kaini sa nasambitang tricycle.
Sa ngonyan, nasa kostudiya na kan mga otoridad an driver kan bus mantang inaandam na an kasong isasangat laban digdi.
