NAGA CITY- Gadan an sarong drug personality mantang lugadan man an live-in partner kaini makalihis mapuli sa armed encounter an anti-illegal drug operation kan mga otoridad sa Barangay Niyugan Laurel, Batangas.
Binisto an nagadan na si Reinier Ambion asin an lugadan na si Mary Grace Sarrido.
Sa impormasyong nakua kan Bombo Radyo Naga hale sa Batangas Police Provicial Office (BPPO), na sa tahaw nin operasyon, natunogan kan mga ini na pulis an saindang katransaksyon kun kaya pig-probaran pa kan mga ining magdulag gamit an sarong kotse.
Nagkaigwa pa nin ralamagan asin ribayan nin putok hasta sa naulang an mga ini sa parte kan Barangay Amuyong Alfonso, Cavite asin nagkaigwang mga tama na kan bala nin badil sa manlaen-laeng parte kan lawas.
Pigprobaran pa mang idalagan sa ospital an duwa alagad binawian na man tulos nin buhay si Ambion mantang binubulong.
Nakumpsikar sa mga suspek an 5-sachet ng pigtutubudang shabu na kinakarkulong nasa 25 gramo an gabat asin nagkakantead nin P170,000.
