NAGA CITY – Iridu an saro katao makalihis maka-engkwentro kan kapulisan an grupo kan rebeldeng New People’s Army sa Brgy. Itangon Bula Camarines Sur.
Sa nakuang impormasyon kan Bombo Radyo Naga sa Camarines Sur Police Provincial Office (CSPPO) napag-araman na mantang nagkukundusir nin operasyon sa lugar an Camarines Sur 1st and 2nd Provincial Mobile Force Company kan makabakbakan kan mga ini an pokumas humenos 20 mga rebelde sa nasambitan ng barangay.
Naghaloy nin haros 20 minuto an riribayan nin putok kunsaen tinamaan an saro sa mga pulis na si PSSgt Jerry De Lima, 39-anyos mantang dae man maaraman kung pira an iridu sa parte kan mga rebelde.
Mientrastanto, narekober kan kapulisan an sarong bandolier, long and short magazine na may mga live ammunitions, sarong tear gas asin duwang fragmentation rifle grenades.
Sa ngunian, nagpapadagos pa an clearing operation kan mga otoridad sa lugar para masusog an mga rebeldeng tulos na nagdurulag makalihis an insidente.
