Pormal nang pinasinayaan an 101 modular shelter units sa Barangay Pacol, Naga City para sa mga benepisyaryo kan pabahay, lalo na an mga vulnerable families asin mga residenteng pirming naaapektuhan kan kalamidad.
Sa intrevista kan Bombo Radyo Naga kay Naga City Mayor Leni Robredo, pangenot na makikinabang sa proyektong ini an mga residente kan Barangay Lerma na regular na nakakaeksperyensya nin grabeng pagbaha sa saindang lugar.
Sinabi kan alkalde na bako lang pansamantalang harong an tuyo kan mga modular shelter kundi magseserbi man ini bilang evacuation center para sa mga residenteng maaapektuhan kan nagkakaibang sakuna, kaiba na an pagbaha asin sunog.
Dugang pa ni Robredo, an 101 housing units parte pa sana kan mas halawig na programa kan siyudad kun sain target na maitindog an kabuuang 300 modular shelter units sa nasabing lugar tanganing matugunan an pangangaipo kan mas dakol na pamilyang nangangailangan nin ligtas asin maayos na matitirhan.
Kaiba sa mga benepisyaryo kan proyekto an pamilya Biñas na nasunugan sa Barangay Cararayan kan Hunyo 10. Sa nasabing insidente, duwang aki kan pamilya an nasawi habang tuluyang nag-abo an saindang harong.
Dakulon an pasasalamat kan pamilya sa pagkatao sainda nin bagong matitirhan, na segun sainda magseserbing bagong pagsiring asin paglaom pagkatapos kan trahedyang saindang pinag-agihan.
Mientras tanto, padagos na ipinapatupad kan lokal na pamahalaan kan Naga an mga programang pangpabahay asin disaster resilience tanganing masiguro an kaligtasan asin kapakanan kan mga residente, lalo na an mga nasa peligro asin pirming naaapektuhan kan kalamidad.
