Nagsumiter na an prosecutor nin International Criminal Court (ICC) kan ikaduwang batch nin ebidensya na nakapalaog an 139 items kontra ki dating Presidente Rodrigo Duterte na naaatubang sa kasong crimes against humanity huli sa saiyang war on drug campaign.
Sa ipinadarang dokumento kan nakalihis na Mayo 5 ni ICC Prosecutor Karim Khan sa ICC Pre-Trial Chamber 1, an bagong set kan mga ebidensya an ipinadara sa defense team ni Duterte kan nakalihis na Abril 30, 2025.
An naenot na grupo kan mga ebidensya kontra ki Duterte ay isinumiter kan bulan man nin Marso.
Sinaysay man ni Khan na an 139 items an inorganisa sa 4-disclosure packages, siring kan contextual elements, modes of liability, murder kan panahon na Mayor pa kan Davao City si Duterte asin man murder sa irarom kan barangay clearance operations kan panahon kan saiyang termino sa pagka-presidente.
Sigun man ki ICC-accredited lawyer asin saro sa abogado kan EJK victims na si Gilbert Andres, an mga bagong batch kan ebidensya an nagpapahiling na igwang elemento nin crimes against humanity sa crackdown kan illegal drugs campaign kan dating Presidente.
Sinaysay ni Andres na an mga ebidensya ay nagpapahiling na igwang opisyal na polisiya sa likod kan mga paggadan na naenot na man pinahimutikan ni Duterte.
Sa opisyal na record kan gobyerno, nagluluwas na labi sa 6,000 an nagadan sa drug war ni Duterte asjn man kadaklan digde an pawang mga sakit sa buhay na suspek na drug users asin dealers, alagad sa pagkarlulo kan human rights group, an numero an pwedeng magpakol pa sa labi sa 30,000.
Nakatalaan man na mag atendir sa hearing para sa confirmation kan charges si Duterte sa Setyembre 23.
