NAGA CITY– Gadan an duwa katao kaibanan an sarong menor de edad sa nangyaring salpukan kan sarong pampasaherong bus asin motorsiklo sa Maharlika Highway, Brgy. Sta. Teresita, Baao, Camarines Sur.
Sa entrevista kan Bombo Radyo Naga ki PC/Insp. Roselyn Vasquez, Chief of Police (COP) kan Baao-PNP, sinaysay kaini na mantang pigbabagtas kan motorsiklong minamaneho kan biktimang si Ronnie Breboneria, 26-anyos kaibanan an 16-anyos kaining pinsan kan biglang mahagop kan kasabatan na bus na minamaneho ni Chrisencio Gago, 31-anyos.
Sigon ki Vasquez, biglang nag-overtake si Gago sa pigsusundan kaining lunadan na nagin rason para mabangga kaini an nasambitan ng motorsiklo na minamaneho ni Breboneria.
Huli sa kusog kan pagkakabangga, tulos na pigbawian nin buhay si Ronnie mantang naidalagan pa man kuta na sa ospital an 16-anyos alagad pigdeklarar nang dead on arrival kan mga doktor.
Sa ngunian, nagtitinir na sa kustodiya kan mga otoridad an suspek mantang pigpepreparar na an kasong isusunad kontra digdi.
