Duwang opisyales kan Sangguniang Kabataan (SK) sa Makati an pigsuspendir kan Department of the Interior and Local Government (DILG) makalihis na maimbuelto sa mga alegasyon nin korapsyon.
Pigbisto kan DILG an mga suspendidong SK officials na sinda Natalia Georgianna Tupaz kan Barangay Dasmariñas asin Cecilia Louise Yabut kan Barangay Magallanes, Makati City.
Si Tupaz sinuspinde sa laog nin anom na bulan pagkatapos na soboot maghagad nin 20% na kickback sa sarong supplier para sa sarong proyekto sa Halloween.
Segun sa imbestigasyon, suportado ini kan mga mensahe sa Viber asin mga record kan call sa telepono.
Siya man an konektado sa soboot pagpalsipikar nin pirma sa sarong resolusyon kan SK.
Mantang tolong bulan na suspendido si Yabut makalihis suboot magsumiter nin mga dokumento na may palsipikado o dae awtorisadong pirma, kabale na an pirma kan sarong SK kagawad na yaon sa abroad kan panahon na idto.
Sigun ki Interior Secretary Jonvic Remulla, posibleng kahampang ni Tupaz an kasong direct bribery, pagbalgar sa Republic Act No. 3019, asin palsipikasyon kan mga public documents sa Office of the Ombudsman.
Huli kan pangyayari, nangangapudan ngonian si Remulla na ikonsiderar an pagtunaw kan SK, asin imbes, ipasa na sa mga barangay council an pagnombra nin mga representante kan mga jovenes.
“An kurapsyon nakaabot na sa SK hanggang sa pinakamayaman na barangay.Dae kami nag-single out nin siisay man, sadit man o mayaman na barangay,” an sabi kan Secretary.
Sinambit man kaini an halangkaw na attrition rate kan mga opisyales kan SK, kun saen dakul an minahale sa saindang pwesto huli sa pag-adal, trabaho, o kasal, na nagresulta sa pagmukna nin mga interim officers.
Magigirumduman na dati nang pigsuherir ni Remulla an posibilidad na haleon na an SK, kasabay kan pangapodan na repormahon an youth representation system sa lebel kan barangay.
Bukas an Bombo Radyo Philippines sa lado kan duwang opisyal kan SK na imbwelto.
