Naga City- Piglangkaw pa kan maysadiri sa 20,000 asin duwang baka komo pabuya sa makakatukdo sa sarong nawawarang ido sa banwaan kan San Jose Partido, Camarines Sur.
Sa entrevista kan Bombo Radyo Naga ki Prof. Emmanuel Onsay, Assistant Professor IV, PARSU Main Campus, furparent kan ido, pigsaysay kaini na nawara an saiyang ataman na si Sakura magpuon kan nakalihis na aldaw nin Sabado Marso 22, 2025, pasado alas 3 nin pagkaaga, nagluwas an ido sa saindang harong asin hasta sa ngunyan dae na ninda nahihiling pa.
Sa paagi kaini, tulos sindang naghagad nin tabang sa paagi kan blotter sa PNP San Jose asin nilibot an gabos nin barangay sa nasambitan ng banwaan para sa marikas na pagkakahanap sa saiyang ido.
Sigun pa ki Onsay, desidido soboot ini na itao an pabuyang nagkakantidad nin 20,000, sarong ina na baka asin ugbon komo reward sa siisay man na makakapagbalik sa saiya ki Sakura.
Pigsaysay pa kan furparent na an saiyang nawawarang ataman na ido ay sarong espeyal na kun saen na-rescue kaini sa sarong unibersidad sa banwaan kan Goa kun saen ini nagtatrabaho, 9 na taon na an nakakalihis.
Inataman kaini an ido asin pigturing na myembro kan saindang pamilya huli man sa pagigin maboot asin matalino kaining ugali komo hayop.
Pigkonsiderar man soboot kaining biyaya si Sakura kaya man gabos na paagi gigibuhon kaini mahanap sana an saiyang ataman na ido.
Sa ngunyan, labi pa an paglaom kan furparent na sa tabang kan mga pabuya, orog na magigin mas marikas an paghanap ki Sakura.
