Inilunsar na kan inter-agency ‘Task Force KKK (Katotohanan, Katapatan, Katarungan) sa Halalan’, kan nakalihis na aldaw nin Biyernes an bagong threat monitoring center na an obheto ay labanan an online disinformation asin man iba pang election violations.
Sa launching ceremony sa Cybercrime Investigation and Coordinating Center (CICC) office sa Diliman, Quezon City, sinaysay ni Presidential Communications Office (PCO) Secretary Jay Ruiz na kahagadan kan pasilidad na protehiran an integridad kan eleksyon.
Sinaysay pa kaini na may mga report an foreign state-sponsored groups na nagpoprobar na impluwensyahan an eleksyon sa nasyon.
An mga analyst gikan sa manlaen-laeng ahensiya kan gobyerno an nakapirmi sa pasilidad asjn man may atas na mangalap nin report manungod sa disinformation o ‘fake news,’ malicious artificial intelligence (AI)-generated content, asin man iba pang election violations sa irarom kan Commission on Elections (Comelec) Resolution No. 1164.
Makalihis mangalap nin report, gagamiton kan mga ini an saindang tools tangani idetermina kun an online post ay sala asin man pinagkokonsoderar na sarong pagbalgar.
An mga report kan vote-buying ay sinasabing kayang masimbagan sa laog sana kan sarong oras, an sarong AI-generated content an nadiskubre sa laog man nin pirang minuto gamit an software tools, mantang an disinformation posts an tutuyawon, asin an kahagadan na pagpapababa ay ipadadara sa tamang digital platforms.
Sa ngunyan, an Task Force KKK an katabang kan Meta, Google, TikTok, X, asin iba pang online platforms para sa marikasan na paglansag kan misinformation.
Sa kaso man na naipakuriyat na an disinformation, nagpaluwas man nin kalatas an task force na pinahikutikan an mga salang salaysay.
Sa ibong na lado, nilinaw ni Comelec Commissioner Nelson Celis na an posts na dae mahihilingan nin ano man na pagbayolar sa Resolution No. 1164 an dae hahalion komo paggalang sa freedom of speech.
Dugang pa igde an paglapigot kan Comelec na labanan an online disinformation sa halalan na nagpuon kan nakalihis na taong 2023 komo ‘Task Force Kontra Fake News.’
Mientrastanto, sinabi man ni Presidential Communications Office Undersecretary asin man Palace Press Officer Claire Castro na an 24/7 threat monitoring center an patunay na naghihiro an gobyerno asin nagkakasararo enkaso man na nakataya na an katotohanan.
