NAGA CITY- Nagsuko na an tolong suspek sa paggadan sa sarong indibidwal na nadukayan an mayo ng buhay na lawas sa basurahan sa San Fernando, Camarines Sur.
Sa entrevista kan Bombo Radyo Naga ki Marcelino Armin Modino, Brgy. Kapitan kan Brgy. Sta. Cruz, sa nasambitan ng banwaan, pigsaysay kaini na katrabaho kan biktima an mga suspek asin kan magselebrar nin kafiestahan sa nasambitan ng barangay, nagkaigwa soboot nin irinuman sa harong kan saindang pinagtatrabahohan.
Huli ta nagkaigwa na nin alitan an duwang lado, digdi na nagpuon an pangbubugbog kan mga suspek sa biktima.
Sigun pa ki Modino, digdi naman soboot binawian nin buhay an biktima asin kan mahiling kan mga suspek na mayo na ini nin buhay, pig-apon na sana kan mga ini an lawas kan biktima sa basurahan sa gilid kan tinampo.
Kinaumagahan man, nagdulok an kaparientes kan biktima sa saindang barangay nin huli ta nawawara na soboot ini kun kaya tolos na nagsagibo nin patrolya an barangay officials asin barangay tanod.
Alagad dae tulos ninda ini nahiling kun kaya inabot nin duwang aldaw an saindang paghahanap.Kun saen, an ama man soboot kan biktima an pigkutoban na magpasiring sa basurahan asin digdi na kaini nahiling an bankay kan saiyang aki na mayo na nin buhay.
Mientrastanto, nasa kustodiya naman kan kapulisan an mga suspek na pig-ako man an ginibong krimen.
Sa ngunyan, nagsasagibo naman sinda nin mga lakdang tanganing makontrol an siring na insidente sa saindang lugar.
