Posible nang maarestar kan mga otoridad si Senador Jinggoy Estrada makalihis mag-isyu nin warrant of arrest an ikalimang dibisyon nin Sandiganbayan ngunyan na aldaw, Hunyo 1.
Katakod ini kan kasong plunder na isinangat kan Office of the Ombudsman kontra sa senador, kaibanan sinda dating Department of Public Works and Highways (DPWH) Secretary Manuel Bonoan asin iba pang imbwelto sa suboot anomalya sa flood control projects na igwang kantidad na maabot sa P573 milyon an urulayan.
Nagpahayag man an Philippine National Police (PNP) kan preparasyon kaini na isiribi an warrant asin arestuhon an lehislador dawa pa man yaon ini sa laog kan Senate premises.
Inaantisiparan na maatendir si Estrada sa regular na plenaryo kan Senado ngonian na hapon nin Lunes. Posibleng oportunidad ini para sa kapulisan ta nganing ikondusir an saindang operasyon enkasong abilable an presensya kan senador sa publiko.
Marurumduman na nagpiyansa si Estrada nin kantidad na maabot sa P90,000 sa suway na kasong graft makalihis iluwas an naenot na warrant nin Second Division kan nasambitang korte. Alagad segun sa ley, “non-bailable” man an saro pa niyang kaso na pandarambong.
Digdi hihilingon kun masuko siya arog sa opsyon na itinao saiya ni Department of Interior and Local Government (DILG) Secretary Jonvic Remulla.
Ini an ikatulong beses na nakasuhan si Estrada sa parehas na sala. Enot na ining nakasuhan kan taong 2001 makalihis maimbwelto sa jueteng katakod kan anomalya na kaibanan an saiyang ama na si dating Presidente Joseph “Erap” Estrada, mantang nautro ini nin ikaduwang beses nin huli sa pagkakadawit sa Priority Development Assistance Fund (PDAF) scam.
