Aabot na sa 32 indibidwal ang naaresto ng Philippine National Police o PNP kaugnay ng mga kasong online libel mula Enero 1 hanggang Mayo 15 ng kasalukuyang taon.
Ayon sa PNP, umabot sa kabuuang 276 kaso ng online libel ang isinampa ng Anti-Cybercrime Group o ACG sa iba’t ibang panig ng bansa.
Batay sa datos ng ACG, ang mga naarestong indibidwal ay nahaharap sa paglabag sa Republic Act 10175 o Cybercrime Prevention Act of 2012, kung saan mas mabigat ang parusa sa online libel kumpara sa traditional libel na nasa ilalim ng Revised Penal Code.
Ipinaliwanag ng PNP na ang online libel ay tumutukoy sa malisyosong pagpaparatang o pagpapakalat ng impormasyon na maaaring makasira sa dangal o reputasyon ng isang tao gamit ang internet at iba pang information and communication technology.
Binigyang-diin naman ni PNP Chief Police General Jose Melencio Nartatez Jr. na bagama’t mahalagang instrumento ang social media sa komunikasyon, may kaakibat itong pananagutan at pananagutan sa ilalim ng batas.
