Padagos an ginigibong effort kan Indian Coast Guard tangani mahanap an apat na iba pang tripulante na nawawara makalihis mangyari an dakulang kasulo sa sarong Singapore-flagged cargo ship sa tahaw kan Arabian Sea harani sa baybayon kan Kerala, India.
Sa presente, 18 sa 22 miyembro kan mga tripulante an naisalbar na kan Indian Coast Guard. Napagaraman na an nawawarang apat na crew an gikan sa Taiwan, Myanmar, asin Indonesia.
Nagpadara na man nin tabang an Singapore Maritime and Port Authority (MPA) tangani suportaran an operasyon.
Marurumdumang gikan pa sa Colombo, Sri Lanka an barko na pasiring Mumbai, India, kan maireport kan pamayuhan kan barko na may nadangog sindang makusog na pagsabog sa sarong container kun saen 50 containers gikan sa barko an nahulog sa dagat.
Mientrastanto nag-isyu nin patanid an Indian National Centre for Ocean Information Services (INCOIS) manungod sa posibleng oil spill asin mga debris gikan sa barko, na pwedeng magkawsa nin peligro sa kalikasan.
