NAGA CITY- Pabor an kabanga o 50% kan Filipino adult population na gibuhong legal sa Pilipinas an diborsyo para sa mga mag-agom “irreconcilably separated” base sa resulta kan First Quarter 2024 Social Weather Report.
Nagtutubod an mga ini na an mag-agom na nagsuwayan na asin dae na marhay an dapat na tugotan na mag-divorce para legal na makapagpakasal utro. Nagbaba an nagpabor sa pagsasalegal kan diborsyo gikan sa 65% na naikurit kan Marso kan nakalihis na taon.
Sa parehong survey, nasa 31% kan mga Pilipinong adults an bakong pabor sa diborsyo mantang 17% man an undecided sa isyu. Sigun sa SWS, halangkaw an numero kan mga pabor sa diborsyo sa mga indibidwal na mag-live-in partners kumparar sa mga dae pa ikinasal, nabalo, nagsuwayan na mag-ago asin mga ikinasal na.
Kun saen, pinakahalangkaw sa Metro Manila, pigsunodan kan Balance Luzon o sa luwas kan Metro Manila, Visayas asin Mindanao. Pag-abot sa relihiyon, sinaysay kan Social Weather Report na an net agreement score sa legalization kan divorce sa nasyon an pinakahalangkaw sa ibang Christian denominations na nasa +21, sa Romano Katoliko +20; sa mga Muslims nasa +11.
Mientrastanto, an isyu sa diborsyo sa nasyon an “moderately weak” man para sa Iglesia ni Cristo na nasa -10. Isinagibo an nasambitan ng survey sa 1,500 adults gikan Balance Luzon, Metro Manila, Visayas asin Mindanao puon Marso 21 hasta 25 kan presenteng taon.
