Dae pinalad asin dagusang binawian nin buhay an nasa anum na katawo makalihis na mabiktima nin pamamadil sa Oman.
Basado sa impormasyon na pigpaluwas kan Royal Oman Police, nangyari an insidente harani sa sarong Mosque sa Wadi al-Kabir region.
Saro man sa miembro kan kapulisan an nadamay asin binawian man nin buhay mantang nasa labi 20 katawo na igwa nin manlaen-laeng lahi an nalugadan.
Nagadan man kan mga nagrespondeng pulis an mga suspek na nasa likod kan insidente.
Pigkumpirmar man kan Ministry of Foreign Affairs kan Pakistan na apat sa mga biktima an saindang residente mantang nasa 30 mga Pakistani man an nalugadan.
Huli sa pangyayari, labi man an pagkamundo na namatian ni Pakistani Prime Minister Shehbaz Sharif asin pig-apod ini komo sarong terror attack.
