Kinumpirma kan mga awtoridad an pag-arestar ki dating kongresista na si Zaldy Co sa Prague, Czech Republic may koneksyon sa kasong malversation of public funds na isinangat laban saiya sa Sandiganbayan.
Sa entrevista kan Bombo Radyo Naga ki Atty. Michael Henry Yusingco (Political Analyst, Senior Research Fellow At The Ateneo Policy Center), sinabi niya na mas pigtututukan ngonian kan mga political observers an posibleng epekto kan pangyayari sa kredibilidad kan mga party-list na konektado saiya, lalo na sa rehiyong Bikol.
Segun sa pag-analisar kan nagkapirang eksperto, posibleng magkaigwa nin negatibong epekto sa tiwala kan publiko, lalo na sa mga botante sa Bikol, huli ta an mga alegasyon may relasyon sa mga proyekto na dapat kutang makakatabang sa rehiyon na parating tinamaan nin kalamidad.
Ipinarisa man na may kaibang responsibilidad an paggamit kan pangaran kan rehiyon sa sarong party-list, kun kaya an anuman na isyu nin kurapsyon pwedeng direktang makaapektar bako sana sa imahe kan organisasyon kundi maging sa representasyon kan mga Bikolano sa Kongreso.
Mientrastanto, piglalaoman na maideport pabalik sa Pilipinas si Co kun sain tulos na ipapautob an warrant asin isasairarom na ini sa kustodiya kan Sandiganbayan.
Sa ibong kaini, pigduon kan mga analista na importante na pabayaan na mag-abante an proseso legal asin dai tulos husgaran an kaso bilang politikal, kundi bilang parte kan pagpapanimbag sa mga opisyales kan gobyerno.
