NAGA CITY – Pigheras kan Department of Information Communication Technology (DICT)-Bicol an nasa 75 laptops sa Baao Community College.
Sa entrevista kan Bombo Radyo Naga ki Rachel Ann Gabrador, OIC Regional Director kan DICT Bicol, sinaysay kaini na sa probinsya kan Camarines Sur, nasa 75 estudyanteng benepisyaryo, 25 digdi an estudyante sa nasambitan ng eskwelahan mantang 50 man sa banwaan kan Limbanan.
Sigun ki Gabrador, igwa sinda nin pigtataong criteria sa mga partner colleges asin sinda mismo an nagpipili kan mga benepisyaryo.
Tangani soboot mamonitor na napapakinabangan kan mga estudyante an laptop, magkakaigwa nin manlaen-laen na training, kun saen, an training na ini an saindang magagamit mantang sinda an mga estudyante pa sana hasta sa magin empleyado ini.
Parte digdi an productivity tools, cyber hygiene, cyber security asin responsible social media user.
Makalihis an training na ini, magkakaigwa man nin exam sa mga estudyante.
Mientrastanto, mapadagos man an siring na programa asin patraining kan DICT sa iba pang mga estudyante.
Dugang pa digdi, lambang probinsya soboot an igwa nin benepisyaryo.
Katakod kaini, padagos man an saindang pakikipag-koordinar sa manlaen-laen na sektor tanganing maabot an mga estudyante, mga negosyante, asin publiko.
Sa ngunyan, pagirumdom na sana kan opisyal sa mga benepisyaryo an pagiging responsableng paggamit kan DCIT tools asin pigtawan-duon kaini na an cyber security an nagpupuon sa sadiri.
