NAGA CITY- Kumpiskaso sa Entrapment Operation kan mga otoridad an 78k smuggled na sigarilyo sa banwaan nin Pili Camarines Sur mantang duwang indibidwal arestado.
Sa entrevista kan Bombo Radyo Naga ki PMaj. Rodolfo Ramos – Deputy Chief of Police kan Pili Municipal Station sinaysay kaining pigsagibo an entrapment sa Zone 5 Barangay, Cadlan Pili Camarines Sur kun saen igdi man nadakop an duwang lalaking nagbebenta nin sigarilyong nin mayong kaukulang permit.
An sarong indibidwal na imbwelto digde si alyas Jay-ar 43 anyos residente kan Canaman Camarines Sur asin kaibahan kaini si alyas Jose residente man kan Camaligan, Camarines Sur 48 anyos.
Tolos man na pigmarkahan an mga nakuang ebidensiya sa mga nagin saksi sa pagkakadakop kan duwang indibidwal.
Nadakop an duwa sa paagi kan pwersa gikan sa Regional Intelligence Division 5, PIO kan Camarines Sur, asin kooperatiba kan Pili Municipal Police Station.
Pigbuyagyag man nin Ramos na an nagin violation kan duwa may kinaaraman sa National Internal Revenue Code na pig-amyendahan kan TRAIN Law Republic Act 10963 Section B 265 Possession of Cigarettes without proper tax stamps.
Antes paman an pag-arestar under surveillance an mga ini tanganing masierto na ining mga tawo imbwelto pagbebenta nin sigarilyong mayong permit.
Mantang nagpapadagos an imbestigasyon nasa kustodiya na kan Pili Municipal Police Station an duwang naarestar.
Dugang pa ni Ramos na an pagbebenta kaini may mga permit na dapat maipasa tanganing magin legal an pagbebenta.
Obheto man kan mga nasambitan na permit an tanganing mapundo na an mga illegal na pagbebenta.
Sa ngunyan labi man an pasasalamat kaini sa mga kooperasyon kan mga namamanwaan tanganing matuldukan na an siring kaining pangyayari.
