Maabot sa 94.9 kilos nin karneng orig na pigtutubudang iligal na ipinapabakal o inaapod na “hot meat” an nakumpiskar sa ginibong joint monitoring and enforcement activity kan National Meat Inspection Service (NMIS) Bicol asin kan Local Government Unit (LGU) kan Bula, Camarines Sur kan Agosto 12, 26.
Ginibo an operasyon sa nagkapirang merkado publiko sa banwaan bilang parte kan padagos na pagmonitor kan mga otoridad tangani na maseguro na an mga karneng ipinapabakal sa publiko ligtas asin nakakaabot sa itinalaan na standards.
Segun ki National Meat Inspection Service (NMIS) Bicol Regional Director Dr. Alex Templonuevo, tulos na isinairarom sa kondenasyon an nakumpiskar na karneng orig na pigkonsiderar na “hot meat” asin itinapok sa LGU Slaughterhouse condemnation pit susog sa eksistidong proseso.
Obheto kan joint monitoring and enforcement activity na maprotehiran an mga konsumidores laban sa pagpabakal nin karne na posibleng dae pa nag-agi sa magkakanigong inspeksyon asin proseso nin pagbuno.
Padagos an pangapodan kan National Meat Inspection Service (NMIS) Bicol asin LGU Bula sa mga konsumidor na magin selective sa mga babakalon na karne asin siguraduhon na hale ini sa lehitimong source asin nag-agi na sa magkakanigong meat inspection.
