NAGA CITY– Naisirbe na kan Department of Interior and Local Government (DILG) an dismissal order laban sa dating alkalde kan banwaan nin Goa, Camarines Sur na si dating mayor Antero Lim asin kina incumbent Vice Mayor Alfredo Gonzaga siring man ki konsehal Alex Camacho.
An nasambitang kasuguan pinaluwas makalihis na mapatotoohan kan Office of the Ombudsman na guilty an mga ini sa kasong gross neglect of duty, conduct prejudicial to the best interest of the service, frequent unauthorized absences asin simple misconduct.
Huli sa nasambitang dismissal order, nahahampang an tolo sa penalidad na perpetual disqualification sa pagkapot nin dawa anong opisina kan gobyerno, forfeiture kan saindang retirement benefits asin an kanselasyon kan saindang mga civil service eligibility.
An nasambitang desisyon laban sa tolong opisyal siring man sa haros 30 persona huli sa kasong serious illegal detention asin malicious mischief na pigsangat kan lado kan pamilya Fuentebella laban sa mga ini.
Nakabwelta pa kuta na sa saindang trabaho an nasambitang mga opisyal kan banwaan kan Oktubre 2015 makalihis na ibasura kan Department of Justice (DOJ) an kasong saindang kinakahampang.
Marurumduman na kan Pebrero 24, 2015 kan kasuhan an mga suspetsado kan mga Fuentebella makalihis na bagaton suboot kan mga ini si dating Tigaon Mayor Arnie Fuentebella na makaluwas sa munisipyo kan Mayo 16, 2013 asin pinurbaran pa suboot kan mga tagasuporta kan aktor na si Aga Muhlach na maglaog sa munisipyo huli naman sa haloy na pag-transmit nin boto.
