(UPDATE) NAGA CITY- Emosyunal an ina kan 24-day old baby boy na nadukayan na mayo ng buhay makalihis na malamos suboot sa laog nin sarong balde na pano nin tubig sa Libmanan, Camarines Sur.
Sa entrevista kan Bombo Radyo Naga ki Jocelyn Mercadero, an ina kan biktima, sinaysay kaini na dae na niya mahanap an saiyang bagong pangaki na umbot pagluwas niya hale sa cr.
Nadukayan na sana ninda sa laog nin balde na pano nin tubig asin mayo ng buhay an nasambitang umboy.
Mientrastanto, sa suway na pakikipag-olay ki Masashi Unaka, an live-in partner ni Mercadero, sinaysay kaini na nagtutubod siya na igwang nangyaring foul play sa pagkagadan kan biktima.
Dae man niya masabi kun sisay an posibleng yaon sa likod kan pagkalamos kan umboy alagad nagtutubod siya na igwang foul play sa pangyayari.
Basado man sa mga otoridad, mayong nakuang ebidensya sa pinangyarihan kan insidente na posibleng makapagtukdo sa yaon sa likod kan krimen.
Katakod kaini, nangapodan man si Unaka sa publiko na posibleng nakahiling sa insidente na makipagkoordinar sa mga otoridad tanganing matawan nin hustisya an pagkagadan kan nasambitang umboy.
Napag-araman na dae totoong aki ni Unaka an 24-day old na umboy huli naman ta aki suboot ini ni Mercadero sa ibang lalaki.
Sa ibong kaini, sinaysay ni Unaka na padangaton niya an umboy asin maraot an saiyang boot sa makangirhat na nangyari digdi.
Sa ngonyan, pigbibilaran na sa saindang residencia sa banwaan nin Libmanan an bangkay kan nasambitang umboy.
