NAGA CITY– Nahahampang ngonian sa kasong pagbalgar sa Comprehensive Law on Firearms and Ammunition an sarong paraoma makalihis na manutok nin badil sa Barangay San Rafael, Burdeos, Quezon.
Susog sa imbestigasyon kan Burdeos-PNP, nasa inuman an biktimang si Baby Liza Mendoza kaibanan si Remely Prudente na dating live-in partner kan suspek na si Jonie Revillame alyas Dayun, 42-anyos.
Bigla suboot nag-abot si Revillame tangani na lapagon an saiyang aki na si Baby Liza alagad dae nagtugot si Prudente.
Pinorbaran ni Mendoza na awaton an saiyang ama asin si Prudente sa pag-iiwal alagad tinutukan suboot nin badil an biktima asin naghuma pang ipuputok ini.
Tulos man na nagkundusir nin operasyon an Burdeos-PNP na nagresulta sa pagkakaarestar ki Revillame sa saiyang harong. Nakumpiskar digdi an badil na 9mm luger mod na kargado nin siyam na bala.
Dinara an nasambitan na armas sa Provincial Crime Laboratory Office (PCLO) para sa maninigong eksaminasyon.
Mientrastanto, nakakarsel na an nasambitan na suspek para sa maninigong disposisyon.
