Retiradong pulis, arestado makalihis makuanan nin loose firearm sa Quezon

NAGA CITY- Sa karsel an bagsak nin sarong retiradong miyembro kan Philippine National Police (PNP) makalihis na madakupan nin bakong rehistradong badil sa Barangay Ayuti, Lucban, Quezon.

Binisto an suspek na si Alejandro Añola, 65-anyos.

Enot kaini, pigserbe kan Lucban-PNP an search warrant sa harong ni Añola huli sa kasong pagbalgar sa RA 10591 o an Comprehensive Law on Firearms and Ammunition.

Sa ginibong pagrekisa, narekober sa pag-iingat kan suspek an sarong caliber .22 magnum revolver na kargado nin duwang bala asin tolong empty shell para sa parehong badil.

Nakakarsel na ini ngonyan sa custodial facility kan Lucban-PNP mantang inaandam na an kasong isasangat laban sa saiya.