NAGA CITY- Arestado an apat na indibidwal makalihis madakop sa kinundusir na operasyon kontra ilegal na pagsusugal kan mga otoridad sa Purok San Toque, Brgy Talao- talao, Lucena City.
Binisto an mga suspek na sinda Shiela Marciano, 25 anyos, Elizabeth Torres, 30 anyos, Elizabeth Duallo, 40 anyos asin Dante Marciano, 43 anyos.
Sa nagunong impormasyon kan Bombo Radyo Naga napag araman na nagkundusir nin operasyon kontra ilegal na pagsusugal an mga otoridad sa nasambitan ng lugar na naging rason kan tulos na pagkakaaresto kan apat na suspek.
Nakumpiskar sa mga ini an 50 piraso nin lastillas, duwang booklet kan STL collection form, duwang log book, anom na ballpen, sarong calculator, sarong clip board, duwang sling bag asin kwartang nagkakantidad P3,027.
Sa ngunian, nasa kustudiya na kan mga otoridad an mga suspek mantang pinepreparar na an kasong pagbalgar sa RA 9287 o an Act Increasing The Penalties For Illegal Numbers Games na isusunad kontra sa mga ini.
