NAGA CITY- Pig-orgolyo kan bagong designar na regional director kan Office of the Civil Defense (OCD) Bicol asin dating brigade commander kan 901st Infantry Brigade, 9th Infantry Division Philippine Army an mga abilidad nin sarong dating heneral sa pagkapot nin sarong posisyon sa gobyerno.
Sa entrevista kan Bombo Radyo Naga ki BGen Claudio Yucot, maugma kaining pigherar na komo dating opisyal kan pwersas armadad kan Pilipinas, igwa siya nin advantage sa pamamayo sa sarong government office huli sa saiyang training sa pagtatao nin serbisyo sa publiko.
Igwa man suboot siyang training asin eksperyensya sa disaster risk reduction management urog pa ta pirming tinatamaan nin makukusog na bagyo asin iba pang klase nin kalamidad an Bicol region.
Sa ibong na lado, aminado man siya na harayo an pinaghale niyang trabaho sa saiyang bagong responsibilidad alagad, pigsierto ni Yucot na gigibuhon niya an gabos para magibo an trabaho sa nasambitang posisyon.
Napag-araman na nakatalaan na ikondusir saaga an turn-over ceremony para sa pormal na pagtukaw sa pwesto ni Yucot komo OCD Bicol director makalihis na idesignar ni presidente Rodrigo Duterte kan Setyembre 27.
Nagkapira man sa mga dating soldados na nagkakapot na ngonyan nin posisyon sa gobyerno sinda DENR Sec. Roy Cimatu asin NIA chief Ricardo Visaya.
