NAGA CITY- Tinawan doon ngonyan kan BAYAN-Bikol na dae suboot solusyon sa problema sa iligal na droga sa Pilipinas an desisyon ni Presidente Rodrigo Duterte na ibalyo na sa Philippine Drug Enforcement Agency (PDEA) an responsibilidad sa pagkokondusir nin mga anti-drug operations.
Sa entrevista kan Bombo Radyo Naga ki Vince Casilihan, tagapagtaram kan Bayan- Bicol, sinaysay kaini na an nasambitang kasuguan saro sana suboot na paagi kan presidente para makalikay na panimbagon an mga darakulang personalidad na yaon sa likod kan illegal drug trade sa Pilipinas.
Dae suboot dagos na mauuntok an problema sa iligal na droga kun padagos na nakakalibre an mga drug lords asin solamenteng an mga tios na Pinoy sana an napapanimbag sa kampanya kontra iligal na droga kan gobyerno.
Nagtutubod man si Casilihan na kun dudugangan an budget kan PDEA asin magkakaigwa nin marhay na rehabilitasyon para sa mga indibidwal na imbwelto sa iligal na droga posibleng makatabang ini sa paglaban sa problema sa pigpapangalad na bulong sa nasyon.
