NAGA CITY– Gadan an sarong lalaki makalihis pagtatagaon kan saiyang nakaiwal sa Sitio Pandan Brgy Calutcot Burdeos, Quezon.
Binisto an biktima na si Luisito Asa Velasco, 52 anyos.
Sa nagunong impormasyon kan Bombo Radyo Naga napag araman na nakikipag-inuman sana an biktima sa saiyang mga kabarkada kan bigla na sana suboot nag-abot an burat man na suspek na si Anghel Balce Jr, 47 anyos asin nag-agyat nin iwal na napuli sa pananaga kan suspek sa biktima.
Huli digdi, nagsapo nin lugad sa manlaenlaeng parte kan saiyang lawas an biktima asin tulos idinalagan sa ospital alagag dai na ini nag abot nin buhay sa pabulungan.
Makalihis an insidente, tulos man nagdulag an suspek dara an sundang na ginamit kaini sa nasambitang krimen.
Sa ngunian, nagpapadagos pa man an imbestigasyon kan mga otoridad sa pangyayare para sa posibleng pagkakadakop kan nagdulag na suspek.
Meintrastanto, pinepreparar na man an kasong Homicide na isusunad kontra sa nasambitan ng suspek.
