NAGA CITY- Nagsapo nin mga danyos an nagkapirang edificio sa banwaan nin Atimonan, Quezon makalihis na magtama digdi an sarong buhawi, mag-uumagahon kan Oktubre 18.
Susog sa mensaheng ipinaabot sa Bombo Radyo Naga ni Dr. Henry Buzar, head, Provincial Disaster Risk Reduction and Management Office (PDRRMO) Quezon, sinaysay kaini na ala-1 nin mag-uumagahon kan mabilog an sarong buhawi sa barangay Caridad Ibaba.
Nagkapirang harong suboot an nahalean nin atop mantang naraot man an pinto kan sarong edificio sa lugar.
Pigngangalas man ngonyan kan PDRRMO-Quezon kun tano mag-uumagahon nabilog an buhawi sa nasambitang barangay.
Dae suboot madalas na nabibilog an sarong buhawi kun mag-uumagahon huli ta mayong malipot asin mainit na duros sa ere an posibleng mag-ibanan.
Mayo man napabaretang nairido katakod kan pangyayari.
