NAGA CITY– Nag-abiso an Bureau of Fisheries and Aquatic Resources (BFAR) Bicol katakod kan nadiskubreng soboot mga parasites sa lawas kan mga balyena, pating asin pagi.
Sa entrevista kan Bombo Radyo Naga ki Nonie Enolva, tagapagtaram kan BFAR-Bicol, sinaysay kaini na daa mayo pang matibay na ebidensyang makakapagpatotoo na pwedeng makaapekto sa tao an mga parasites, posible soboot na magdakula sa mismong lawas kan tao an mga bulateng gikan sa nasambitan ng mga sira.
Kinumpirmar ni Enolva na sa mga pigibong pag-aadal kan BFAR sa mga na-stranded na sira arug kan dwarf sperm whale sa Sorsogon, nahiling sa lawas kaini an kadakol na bulate mantang sa Camarines Norte naman , nadukayan an haros 177 larvae o sugok kan Phyllobothrium delphini sa lawas kan sarong dolphin.
Nagpapaluya soboot sa immune system kan sira an parasites na nagigin kawsa kan saindang pagpadpad sa hababaw na parte kan kadagatan o an pagkagadan.
Sa ngunian, nagpapadagos an pag-aadal kan BFAR katabang an ibang institusyon para maberipikar an peligro na dara kan parasites na nadiskubre sa lawas kan nasambitan ng mga sira.
Napag-araman na pigigibong sahog an paagi sa sikat na pagkakan sa Bicol na kinunot.
