NAGA CITY– Nagpapadagos ngunian an paghahanap sa riding in tandem na imbwelto sa panghoholdap sa Brgy. San Vicente, Buhi, Camarines Sur.
Sa nagunong impormasyon kan Bombo Radyo Naga napag araman na binabagtas ni Hilario Gatab, 27 anyos, empleyado kan sarong lending company, lunad kan saiyang motorsiklo an kalabaan kan tinampo sa nasambitan ng lugar pasiring Brgy. Itaran, Polangui, Albay kan bigla na sana ining bagaton kan riding in tandem asin tulos tinutukan nin kalibre. 38 badil asin nagdeklara nin hold-up.
Tulos na sanang inagaw kan mga dai pa nabibistong suspek an darang bag ni Gatab asin tulos man nagdulag.
Sa inisyal na imbestigasyon kan mga otoridad napag aramang nalalay kan mga suspek an collection money na nagkakantidad P10,000, personal na kwarta kan biktima na nagkakantidad P5,800, duwang unit nin cellphone asin mga importanteng gamit.
Sa ngunian, padagos pa man an ginigibong imbestigasyon kan mga otoridad sa pangyayari para sa posibleng pagkakadakop kan nagdulag na suspetsado.
