NAGA CITY- Nagtitinir na ngonyan sa kostudiya kan Philippine Drug Enforcement Agency (PDEA) Camarines Sur an apat na persona makalihis an pigkondusir na anti-illegal drugs operation sa Baao, Camarines Sur.
Sa entrevista kan Bombo Radyo Naga ki Agent Pongs kan PDEA-Camarines Sur, sinaysay kaini na enot na pigkondusir an buy-bust operation sa Lendes Tourist Inn sa barangay La Medalla.
Naarestar sa nasambitang operasyon si Ryan Medialdea, na nagpabisto komo pamangkin suboot ni Exec. Sec. Salvador Medialdea kaibanan sinda Romeo Guevarra asin Christian Bañaria.
Maabot suboot sa 80 grams nin pigtutubudang shabu na nagkakantidad nin P480,000 an nakumpiskar kan mga operatiba sa tolong mga suspetsado.
Sigon ki Agent Pongs, pigkokonsiderar na ‘bigtime’ drug pusher an nasambitang mga suspek urog na si Medialdea huli sa dakol na droga na nakumpiskar sa mga ini.
Mientrastanto, naarestar man sa pigkondusir na buy bust operation sa barangay Sta Teresita sa parehong banwaan an suspek na si Leo Peyra.
Nakumpiskar sa saiyang pag-iingat an 50 grams nin pigtutubudang shabu na nagkakantidad nin P300,000.
Enot na suboot na nagsuko sa Oplan Tokhang kan Philippine National Police (PNP) an nasambitang apat na mga suspetsado.
Sa ngonyan, nasa kostudiya kan PDEA-Camarines Sur an nasambitang mga suspetsado mantang inaandam na an kasong isasangat laban sa mga ini.
