NAGA CITY- Nagpapadagos ngonyan an pigkokondusir na relief operations kan Office of the Civil Defense (OCD) Bicol urog na sa mga lugar na igwang nairehistrong landslide asin pagbabaha dara kan maraot na kamugtakan nin panahon.
Ini an kinumpirmar ni Claudio Yucot, regional director, kan OCD-Bicol sa entrevista kan Bombo Radyo Naga.
Sigon ki Yucot, nagtao na an saindang opisina nin mga relief packs sa mga pamilya na nag-evacuate sa nagkapirang banwaan sa probinsya nin Camarines Sur asin Camarines Norte makalihis an nangyaring landslides asin pagbabaha digdi.
Nakapuli naman suboot sa saindang mga harong an nag-evacuate na mga pamilya makalihis an pigpautob na pre-emptive evacuation kan mga kabuhan kan Provincial Disaster Risk Reduction and Management Office (PDRRMO) sa nasambitang mga probinsya.
Sigon ki Yucot, padagos pa nanggad an monitoring kan saindang opisina sa nagkapirang mga lugar sa rehiyong Bicol urog na sa mga tinampo na dae pa nanggad maagihan hasta sa ngonyan makalihis an nangyaring landslide asin pagbabaha digdi.
