NAGA CITY- Pigkakarkulong maabot na sana suboot sa poko mas umenos 50 an mga miyembro kan rebeldeng New People’s Army (NPA) an nakikipagbakbakan laban sa tropa kan gobyerno sa probinsya nin Camarines Sur.
Ini an sinaysay ni Capt. Joash Pramis, chief, Division of Public Affairs Office (DPAO) kan 9th Infantry Division, Philippine Army sa entrevista kan Bombo Radyo Naga.
Sigon ki Pramis, sa saindang pagtatantsa, poko mas umenos 50 regular members na sana suboot kan rebeldeng grupo an nakikipagbakbakan sa mga soldados.
Katakod kaini, pigsierto kan opisyal na mapadagos an ginigibong operasyon kan mga militar laban sa makakawalang grupo.
Enot kaini, nagbungkaras kasabay kan Todos Los Santos an engkwentro sa pag-ultanan kan tropa nin gobyerno asin pigkakarkulong 15 miyembro kan NPA sa Sitio Lidong, barangay Bulawan sa banwaan nin Sipocot, Camarines Sur.
Sigon ki Pramis, igwang nagpaabot nin impormasyon sa mga soldados manungod sa pangingikil suboot kan mga rebelde sa mga residente sa nasambitang lugar.
Naghaloy nin haros 40 minuto an riribayan kan putok sa pag-ultanan kan duwang lado.
Sa ngayon, padagos pang inaaram kan mga militar kun sisay an posibleng lider kan grupo nin mga rebelde na naka-engkwentro kan mga soldados.
